काठमाडौं — सार्वजनिक खरिद अनुगमन कार्यालयले १५ वटा निर्माण व्यवसायी तथा आपूर्तिकर्तालाई कालोसूचीमा राख्नुअघि सात दिनभित्र लिखित स्पष्टीकरण पेस गर्न निर्देशन दिएको छ ।
कार्यालयले बुधबार सूचना जारी गर्दै कालोसूचीमा राख्न नपर्ने आधार र प्रमाण भए सात दिनभित्र लिखित रूपमा पेस गर्न भनेको हो ।
विभिन्न सार्वजनिक निकायहरूले ती व्यवसायी तथा आपूर्तिकर्तालाई कालोसूचीमा राख्न सिफारिस गर्दै निवेदन दिएका थिए । यसअघि ३० दिनभित्र स्पष्टीकरण बुझाउन सूचना दिइए पनि सम्बन्धित पक्षबाट जवाफ नआएपछि पुनः सात दिनको समय दिइएको कार्यालयले जनाएको छ ।
तोकिएको अवधिमा चित्तबुझ्दो स्पष्टीकरण नआएमा सम्बन्धित व्यवसायी तथा आपूर्तिकर्तालाई कालोसूचीमा राख्ने प्रक्रिया अघि बढाइनेछ ।
कालोसूचीमा परेका कम्पनीहरूले तोकिएको अवधिसम्म कुनै पनि सार्वजनिक निकायको खरिद प्रक्रियामा सहभागी हुन पाउने छैनन् ।
