काठमाडौँ । काठमाडौँ महानगरपालिकाले आगामी आर्थिक वर्ष २०८३/८४ का लागि करिब २५ अर्ब ८८ करोड रुपैयाँ बराबरको बजेट प्रस्ताव गरेको छ।
बिहीबार नगरसभामा कार्यवाहक प्रमुख सुनिता डंगोलले बजेटसँगै कार्यक्रम, आर्थिक विधेयक र विनियोजन विधेयक प्रस्तुत गरेकी हुन्।
प्रस्तावित बजेटमध्ये करिब २५ अर्ब १३ करोड रुपैयाँ सञ्चित कोषमार्फत खर्च हुने र बाँकी ७५ करोड रुपैयाँ अन्य शीर्षकमा व्यय हुने जानकारी दिइएको छ। चालू आर्थिक वर्षमा महानगरले करिब २५ अर्ब ११ करोड रुपैयाँको बजेट ल्याएको थियो।
आगामी वर्षका लागि आन्तरिक आय र बैंक मौज्दातबाट झण्डै २० अर्ब १८ करोड रुपैयाँ जुट्ने अनुमान गरिएको छ भने संघीय र प्रदेश सरकारबाट अनुदान तथा राजस्व बाँडफाँटमार्फत करिब ४ अर्ब ९३ करोड रुपैयाँ प्राप्त हुने अपेक्षा गरिएको छ। साथै, जनसहभागिताबाट करिब १ करोड रुपैयाँ संकलन हुने अनुमान गरिएको छ।
