काठमाडौँ । शेयर बजारका उतारचढावबीच सुरक्षित, पारदर्शी र दीर्घकालीन लगानी विकल्प खोज्दै हुनुहुन्छ भने 'ग्लोबल आइएमई समुन्नत योजना–२ म्युचुअल फण्ड' तपाईंका लागि उपयुक्त हुन सक्छ। २०८२ आषाढ २२ गते आइतबारदेखि सर्वसाधारण र संघ–संस्थाका लागि सार्वजनिक निष्काशन खुला गरिएको यस योजनाले तपाईंको लगानीलाई अनुभवी हातमा सुम्पन मौका दिएको छ।
यो बन्दमुखी योजना हो, जसको अवधि १० वर्षको हुनेछ। यस अवधिमा तपाईंले लगानी गरेको इकाईलाई मर्ज गरेर फिर्ता लिन सकिन्न, तर हरेक वर्ष लाभांश प्राप्त गर्न सकिन्छ। प्रारम्भिक कोष आकार १.२० अर्ब रुपैयाँ रहेको यस योजनामा १२ करोड इकाई निष्काशन गरिएको छ। प्रति इकाईको मूल्य १० रुपैयाँ तोकिएको छ र न्यूनतम १०० इकाईदेखि अधिकतम १.२० करोड इकाईसम्म आवेदन दिन सकिन्छ।
यस योजनाको व्यवस्थापन नेपालकै पहिलो मर्चेन्ट बैंक ग्लोबल आइएमई क्यापिटल लिमिटेडले गर्दैछ। यस क्यापिटलमा ग्लोबल आइएमई बैंकको ८१.५० प्रतिशत स्वामित्व रहेको छ। लगानीकर्ताको पैसा व्यवस्थापन गर्ने कार्यमा यस कम्पनीको अनुभवी टिम लागिपरेको छ। म्युचुअल फन्डको लाभ भनेको तपाईंले बजार बुझ्नै नपर्ने, बजारको उतारचढाव, कहाँ लगानी गर्ने र कति लगानी गर्नेजस्ता जटिल कामहरू क्यापिटलले नै गर्छ।
ग्लोबल आइएमई क्यापिटलका सीईओ मन्दीप लुइँटेलका अनुसार यो योजना विशेष गरी उनीहरूका लागि उपयोगी हुन्छ जो बजारमा सशक्त तरिकाले उपस्थित भएर लगानी गर्न समय निकाल्न सक्दैनन् । उनले बताए अनुसार, “मानौं तपाईंसँग पाँच लाख रुपैयाँ छ । तपाई लगानी गर्न चाहनुहुन्छ तर व्यस्त हुनुहुन्छ । बजार कहाँ जान्छ भन्ने पनि पर्याप्त जानकारी छैन । त्यस अवस्थामा तपाईंले यो फन्डमा लगानी गर्न सक्नुहुन्छ र बाँकी जिम्मेवारी हामीलाई सुम्पन सक्नुहुन्छ ।”
लगानी मिश्रणका हिसाबले पनि समुन्नत योजना–२ सन्तुलित फन्ड हो । यसमा ७०–९० प्रतिशत रकम शेयर बजार (इक्विटी) मा लगानी गरिन्छ । जहाँ प्रतिफलको सम्भावना उच्च हुन्छ तर जोखिम पनि हुन्छ। बाँकी १०–३० प्रतिशत फिक्स डिपोजिट, ऋणपत्र वा नगदजस्ता कम जोखिम भएका साधनमा लगानी गरिन्छ। यसले जोखिम व्यवस्थापनमा सन्तुलन ल्याउँछ।
यो योजना शेयर बजारको अवसर उपयोग गर्न चाहने तर सीधै बजारमा नजाने व्यक्तिहरूका लागि आकर्षक विकल्प हो। कारण के भने बजारको जानकारी नभए पनि, क्यापिटलको विशेषज्ञ टिमले तपाईंको लगानीलाई व्यावसायिक रणनीतिअनुसार सञ्चालन गर्छ। अझ लाभदायक पक्ष के भने म्युचुअल फन्डमा लगानी गर्दा निश्चित कर छुट पाउन सकिन्छ । यो दीर्घकालीन लगानीकर्ताका लागि आर्थिक रूपले सहज विकल्प हो।
ग्लोबल आइएमई क्यापिटलले यस योजनाबाट लगानीकर्तालाई १० वर्षमा औसत २२.४९ प्रतिशत प्रतिवर्ष प्रतिफल दिने अनुमान गरेको छ। जसअनुसार, १० वर्षमा लगानीकर्ताले २२४.९६ प्रतिशत कुल प्रतिफल प्राप्त गर्नेछन्। यसको अनुमानित आन्तरिक प्रतिफल दर १६.८८ प्रतिशत रहने बताइएको छ। पहिलो ९ वर्षसम्म ८ प्रतिशतदेखि २० प्रतिशतसम्म लाभांश वितरण हुने पनि प्रक्षेपण गरिएको छ।
ग्लोबल आइएमईले यसअघि पनि दुई वटा म्युचुअल फन्ड योजना सञ्चालन गरिसकेको छ। समुन्नत योजना–१ ले ७ वर्षमा १०५.६ प्रतिशत प्रतिफल दिएको छ। दोस्रो योजना ‘ग्लोबल आइएमई ब्यालेन्स्ड फन्ड–१’ हाल १० वर्ष अवधिको हो, जसले हालसम्म तीन वर्षमा करिब ३३ प्रतिशत प्रतिफल दिएको छ।
यस योजनामा आवेदन दिनको लागि, लगानीकर्ताले ‘मेरो शेयर’ नामक अनलाइन प्रणालीमार्फत सि–आस्बा प्रयोग गर्न सक्नेछन्। साथै धितोपत्र बोर्डबाट अनुमोदन प्राप्त गरेका सबै आस्बा सदस्य बैंक तथा वित्तीय संस्थाहरूको शाखाबाट पनि आवेदन दिन सकिनेछ।
योजनाको विश्वसनीयता बढाउन क्रेडिट रेटिङ्ग संस्थाहरूबाट पनि सकारात्मक मूल्यांकन प्राप्त भएको छ। इक्रा नेपालले कोष प्रवद्र्धकलाई ‘इक्रा एनपी इस्यूअर रेटिङ्ग ए माइनस’ र इन्फोमेरिक्सले योजना व्यवस्थापकलाई ‘आईआरएन एएमसी क्वालिटी ३’ रेटिङ्ग प्रदान गरेका छन्।
सारांशमा भन्नुपर्दा, ग्लोबल आइएमई समुन्नत योजना–२, दीर्घकालीन, सन्तुलित र व्यवसायिक लगानी खोज्ने जो–कोहीका लागि भरपर्दो गन्तव्य बन्न सक्छ। बैंक ब्यालेन्समात्र राखेर होइन, त्यो रकमलाई हुर्काएर भविष्य सुरक्षित बनाउने चाहना राख्नुहुन्छ भने—यो योजना तपाईंको लागि सुरुको सही मोड हुनसक्छ।
