काठमाडौं। धौलागिरी लघुवित्त वित्तीय संस्था लिमिटेडले वार्षिक साधारण सभा आह्वान गरेको छ। चैत २१ गते बसेको सञ्चालक समितिको निर्णयअनुसार सभा आगामी वैशाख २२ गते बाग्लुङ नगरपालिकास्थित धौलागिरी सामुदायिक स्रोत विकास केन्द्रमा बिहान ११ बजेबाट सुरु हुनेछ।
सभामा संस्थाको पूँजी वृद्धि सम्बन्धी योजना प्रस्तुत गरी अनुमोदन गर्ने कार्यसूची रहेको छ। साथै, अन्य लघुवित्त संस्थासँग गाभ्ने वा प्राप्ति प्रक्रियामा अघि बढ्न सञ्चालक समितिलाई अधिकार दिने विशेष प्रस्ताव पनि पेश गरिनेछ।
यसका अतिरिक्त, अध्यक्षमार्फत आर्थिक वर्ष २०८१/८२ को वार्षिक प्रतिवेदनमाथि छलफल हुनेछ। सोही सभामा लेखापरीक्षकको प्रतिवेदनसहित असार मसान्तसम्मको वासलात, नाफा–नोक्सान विवरण तथा नगद प्रवाहसम्बन्धी प्रतिवेदनहरू पारित गर्ने प्रस्ताव पनि प्रस्तुत गरिनेछ।
आगामी आर्थिक वर्षका लागि लेखापरीक्षक नियुक्ति तथा पारिश्रमिक निर्धारण, सञ्चालकहरूको मनोनयन वा नियुक्तिको अनुमोदन लगायतका विषयहरू पनि सभाको कार्यसूचीमा समावेश छन्।
साधारण सभा प्रयोजनका लागि कम्पनीले वैशाख १० गते बुक क्लोज गर्ने निर्णय गरेको छ। त्यसैले वैशाख ९ गतेसम्म नेप्सेमा सेयर किनबेच गरी नाम कायम गरेका लगानीकर्ताहरू मात्र सभामा सहभागी हुन योग्य रहनेछन्।
