काठमाडौं । नेपाल बीमा प्राधिकरणका अध्यक्ष सुर्यप्रसाद सिलवालले बीमक, बीमित, सर्भेयर, अभिकर्ता तथा कुनै पनि सरोकारवाला निकायहरुलाई नआत्तिन बरु मनोबल बढाएर उत्साहका साथ काम गर्न निर्देशन दिएका छन् । आर्थिक भ्वाईससँग पोस्ट बजेट समिक्षा गर्ने क्रममा उनले बीमकहरु निराश हुनुपर्ने कुनै अवस्था नरहेको स्पष्ट पारे ।
यता बीमा कम्पनीहरुले विभिन्न संचार माध्यमहरुमा बजेट अपेक्षित नरहेको प्रतिक्रीया दिइरहेको बेलामा अध्यक्ष सिलवालले नेपाल बीमा प्राधिकरणको उपस्थिती हर-हिस्सा र आवश्यकतामा रहने औँल्याएका छन् ।
सिलवालले आर्थिक भ्वाइससँग भने,‘अब बजेट त भने जस्तै आएको छ त ।
उनले थपे,‘सबैभन्दा मुख्य कुरा भनेको नियमनकारी निकायको क्षमता अभिवृद्धिको कुरा सरकारले उठाएको छ । बाँकी क्षेत्र त यही नियमनकारी निकायले हेर्ने होनी । कृषि बीमामा पनि १ अर्ब ६५ करोड अनुदान सरकारले दिने भइसक्यो । त्यति मात्र नभई न्यून आय भएका र सीमान्तकृत वर्गलाई पनि बीमा समेटने योजना सरकारले बनाएकै छ । बीमा प्राधिकरण भनेको त सरकारको सल्लाहकार पनि होनी । हामीलाई त सरकारले नै बनाएको हो । बीमा बजारको बिस्तारको लागि नै हामी भएकाले सबै कुरा बजेटलाई नै आधार मान्ने प्रवृत्ती पनि त ठिक होइन नी ।’
उनले कतिपय बीमा कम्पनी र बीमा क्षेत्रले आफ्ना विभिन्न मागहरु सम्बोधन नभएको बताइरहदा अहिले यस्तो मन्दीको समयमा निराशाजनक कुरा गर्ने भन्दा पनि जताततैबाट आशा, भरोसाका दियो बाल्न सक्नु पर्ने प्रतिक्रीया दिएका छन् ।
