काठमाडौं । प्रतिनिधिसभाको बैठक आज शुक्रबार समेत बस्दै नबसी स्थगित भएको छ। दिँसो १ बजे बस्नेगरी तय भएको आजको बैठक आइतबार दिउँसो १ बजेसम्मका लागि स्थगित भएको हो।
भिजिट भिसा प्रकरणमा मुछिएका गृहमन्त्री रमेश लेखकमाथि छानबिनका लागि उच्चस्तरीय आयोग बन्नै पर्ने अडान राखेर विपक्षी दलहरूले सदनमा अवरोध गर्दै आएका छन्। खुलाउने प्रयास विफल भएपछि शुक्रबार बैठक बस्दै नबसी स्थगित भएको हो।
यस प्रकरणलाई लिएर विपक्षीहरूले १३ गते देखि नै सदनमा अवरोध गर्दै आएका छन्। संवैधानिक व्यवस्था अनुसार १५ जेठमा बजेट प्रस्तुत गर्नैपर्ने भएकाले त्यसदिन भने उनीहरूले बैठक चल्न दिएका थिए।
तर त्यसपछि प्रक्रियामा विपक्षी दलहरूले निरन्तर अवरोध जारी राखेका छन्। बैठक सञ्चालनका लागि सभामुख र सत्तारुढ दलहरूले पटक–पटक उनीहरूसँग छलफल गरे पनि सहमति जुटेको छैन।
