काठमाडौं । साउन महिनाको पहिलो कारोबार तथा यस साताको अन्तिम कारोबारका दिन आज शेयर बजारमा उच्च अंकले वृद्धि भएको छ।
नेपाल स्टक एक्सचेञ्ज (नेप्से) ७९.८२ अकंले बढेर २८७४.६० बिन्दुमा पुगेको छ।
आज १३ वटै सूचकमा हरियाली देखिएको छ। बिहीबार बैंकिङ समूहको १.९७ प्रतिशत, विकास बैंक समूहको २.०५ प्रतिशत, फाइनान्स समूहको ३.०६ प्रतिशत, होटल तथा पर्यटन समूहको २.८० प्रतिशत, हाइड्रोपावर समूहको ३.१५ प्रतिशत, इन्भेष्टमेन्ट समूहको ३.३३ प्रतिशतले शेयर मूल्य बढेको छ।
आजदेखि मौद्रिक नीति कार्यान्वयनमा आएपछि शेयर बजारमा तीव्र वृद्धि देखिएको हो। गभर्नर डा.विश्वनाथ पौडेलको नेतृत्वमा सार्वजनिक भएको यो पहिलो मौद्रिक नीतिले बजारमा बुल ल्याएको हो। मौद्रिक नीतिमा अर्थतन्त्रलाई सक्रिय बनाउने उद्देश्यसहित लचकता देखाइएकाले पूँजी बजारले सकारात्मक प्रतिक्रिया दिएको छ ।
मौद्रिक नीति मार्फत शेयर धितो कर्जाको सीमा १५ करोड रुपैयाँबाट बढाएर २५ करोड रुपैयाँ पु¥याउने निर्णयका कारण लगानीकर्ताको मनोबल उच्च भएको छ । आज नेपाल पुनर्बीमा कम्पनीको सबैभन्दा बढी रुपैयाँको कारोबार भएको छ । कम्पनीको ८१ करोड ६४ लाख रुपैयाँको शेयर कारोबार भएको छ ।
त्यस्तै, बुटवल पावर कम्पनीको ६० करोड दुई लाख रुपैयाँ, राधि विद्युत कम्पनीको ५६ करोड १० लाख रुपैयाँ, सानिमा माई हाइड्रोपावरको ४१ करोड रुपैयाँको कारोबार भएको छ ।
