काठमाडौं । सप्तकोशी डेभलपमेन्ट बैंक लिमिटेडले मर्जर तथा प्राप्ति (एमएण्डए) प्रक्रियामा प्रवेश गर्ने निर्णय गरेको छ। सञ्चालक समितिको जेठ २३ गते बसेको बैठकले अन्य बैंक तथा वित्तीय संस्थासँग गाभिने वा प्राप्ति गर्ने विकल्पमा अघि बढ्ने निष्कर्ष निकालेको हो।
यस प्रस्तावलाई स्वीकृत गर्न बैंकले असार १४ गते बिहान ११ बजे मोरङको विराटनगरस्थित होटल रुविजमा १५औँ वार्षिक साधारण सभा बोलाएको छ।
सभामा मर्जर तथा प्राप्तिसम्बन्धी सम्पूर्ण प्रक्रिया अघि बढाउन सञ्चालक समितिलाई पूर्ण अधिकार दिने प्रस्ताव पेश गरिनेछ।
यसका अतिरिक्त, सभामा आर्थिक वर्ष २०८१/८२ को वार्षिक प्रतिवेदन, लेखापरीक्षण प्रतिवेदन, वित्तीय विवरण तथा नगद प्रवाह विवरणमाथि छलफल गरी पारित गरिनेछ।
त्यसैगरी, चालु आर्थिक वर्ष २०८२/८३ का लागि बाह्य लेखापरीक्षक नियुक्ति र पारिश्रमिक निर्धारणसम्बन्धी प्रस्ताव पनि सभामा प्रस्तुत गरिनेछ।
बैंकले मर्जर प्रक्रियामा अघि बढ्दै आफ्नो पूँजी आधार सुदृढ गर्ने र प्रतिस्पर्धात्मक क्षमता बढाउने लक्ष्य लिएको जनाएको छ।
