काठमाडौं । बुधबार नेपाली बजारमा सुनको मूल्यमा उल्लेख्य वृद्धि देखिएको छ। नेपाल सुनचाँदी व्यवसायी महासंघका अनुसार छापावाल सुनको मूल्य एकैदिन ५ हजार ४ सय रुपैयाँले बढेको हो।
मंगलबार प्रतितोला २ लाख ८५ हजार ६ सय रुपैयाँमा कारोबार भएको छापावाल सुन आज बढेर २ लाख ९१ हजार रुपैयाँ पुगेको छ। पछिल्ला दिनहरूमा अन्तर्राष्ट्रिय बजारको प्रभावसँगै स्थानीय बजारमा समेत सुनको भाउ उकालो लागेको देखिन्छ।
यसैगरी चाँदीको मूल्यमा पनि सामान्य वृद्धि भएको छ। मंगलबार प्रतितोला ४ हजार ३७० रुपैयाँ कायम भएको चाँदी आज ११० रुपैयाँले बढेर ४ हजार ४८० रुपैयाँ पुगेको महासंघले जनाएको छ।
सुनसँगै चाँदीको मूल्यसमेत बढेसँगै बजारमा बहुमूल्य धातुप्रति चासो पुनः बढ्न थालेको छ।
