काठमाडौँ । साताको पहिलो कारोबार दिन सोमबार सेयर बजारमा उत्साह देखिएको छ । नेपाल स्टक एक्सचेन्ज (नेप्से) परिसूचक २५.५५ अंकले बढेर २५८५.०४ विन्दुमा पुगेको छ ।
बजारमा आज कुल १ करोड १५ लाख ९१ हजार कित्ता सेयर खरिद–बिक्री हुँदा कारोबार रकम ४ अर्ब ६८ करोड ४५ लाख रुपैयाँ पुगेको छ ।
कारोबार भएका कम्पनीमध्ये अधिकांशको सेयर मूल्य बढेको छ । आज २२६ कम्पनीको सेयर मूल्य उकालो लाग्दा ४७ कम्पनीको मूल्य घटेको छ भने २ कम्पनीको सेयर मूल्य स्थिर रहेको छ ।
आजको बजारमा इन्फिनीटी लघुवित्तको सेयर मूल्य सर्वाधिक ६.४३ प्रतिशतले बढेको छ । त्यस्तै, त्रिशुली जलविद्युत्को ६.३८ प्रतिशत, श्रीजनशील लघुवित्तको ५.९३ प्रतिशत, मल्टीपर्पोश फाइनान्सको ५.२१ प्रतिशत र एनआईसी एसिया सेलेक्ट फण्डको ४.८८ प्रतिशतले सेयर मूल्य बढेको छ ।
त्यसैगरि, एनआरएनको सर्वाधिक सेयर खरिदबिक्री भएको छ । कम्पनीको आज २४ करोड ९० लाख रुपैयाँमाथिको कारोबार भएको छ ।
लिबर्टी इनर्जीको २३ करोड ८४ लाख, सानिमा मिडल तमोरको २० करोड ३८ लाख, रिलायन्स स्पिनिङ मिल्स्को १७ करोड ७८ लाख, अपी पावरको १७ करोड ७७ लाख रुपैयाँमाथिको कारोबार भएको छ ।
बजारमा अधिकांश कम्पनीको सेयर मूल्य बढेसँगै नेप्से परिसूचकमा पनि दोहोरो अंकको वृद्धि देखिएको हो । कारोबार रकमसमेत ४ अर्ब ६८ करोड रुपैयाँभन्दा माथि पुगेको छ ।
