मुक्तिनाथ कृषि कम्पनीको पहिलो चरणको आईपीओ बाँडफाँट

काठमाण्डौ । मुक्तिनाथ कृषि कम्पनीले वैदेशिक रोजगारीमा संलग्न नेपालीहरुका लागि निष्कासन गरेको पहिलो चरणको आईपीओ बाँडफाँट गरेको छ ।

कम्पनीका अनुसार यस निष्कासनमा ३१ हजार १९६ वटा आवेदन प्राप्त भएको थियो । जसमध्ये २ जना आवेदकहरुको आवेदन रितपुर्वक नदेखिएकोले रद्द भएको छ भने कुल ३१ हजार १९४ जना आवेदकहरुलाई योग्य मानेर सेयर बाँडफाँट गरिएको छ ।

धितोपत्र निष्कासन तथा बिक्री प्रबन्धक एनआइएमबि एस क्यापिटलको कार्यालय लाजिम्पाटमा बिहीबार आईपीओ बाँडफाँट भएको हो ।

कम्पनीले वैदेशिक रोजगारमा रहेका नेपालीहरुलाई गत कात्तिक १० देखि कात्तिक २४ सम्म १ लाख ४० हजार कित्ता सेयर निष्कासन गरेको थियो । कम्पनीले यसपछि आगामी मंसिर ८ गते शुक्रबारदेखि सर्वसाधारणलाई ११ लाख ४८ हजार कित्ता सेयर निष्कासन गर्ने छ ।