काठमाडौँ । धितोपत्र बजारका ब्रोकर्स कम्पनीका दुई साझा संस्था एक आपसमा गाभिएका छन्। आज एक कार्यक्रमको बिचमा दुई वटा संस्था मिलेर एउटै संस्था अस्तित्वमा राख्ने सम्झौता गरिएको छ ।
यससँगै, ३१ वर्ष लामो इतिहास बोकेको स्टक ब्रोकर्स एसोसिएसन अफ नेपाल सञ्चालनमा रहने भएको हो । स्टक ब्रोकर्स एसोसिएसन अफ नेपाल र धितोपत्र ब्रोकर्स एसोसिएन नेपालबिच एकीकरण भएर धितोपत्र दलालको एउटा मात्रै छाता संगठन बनाउने सहमति भएको दुई संस्थाद्वारा जारी विज्ञप्तिमा उल्लेख छ।
धितोपत्र ब्रोकर्स एसोसिएसन नेपालको तर्फबाट महासचिव कृष्ण गिरीको संयोजकत्वमा कोषाध्यक्ष सुमन कुमार मल्ल तथा सदस्य सन्दिप विक्रम राणा सहितको तीन सदस्य गरी कूल ६ सदस्यीय टोलीबिच विभिन्न चरणमा छलफल भई एकीकरणको सहमति भएको बताइएको छ ।
साझा व्यावसायिक संघ निर्माण गर्न स्टक ब्रोकर्स एसोसिएसन अफ नेपालका निवर्तमान अध्यक्ष सन्तोष मैनालीको संयोजकत्वमा सचिव सुयोग अधिकारी र कोषाध्यक्ष मदन पौडेल सम्मिलित तीन सदस्य खटेका थिए । एकीकरणको सहमति भएसँगै आजबाटै दुई एसोसिएसन एक भएको घोषणा गर्दै दुई एसोसिएसनका अध्यक्षहरूले हस्ताक्षर गरेका हुन् ।
