काठमाडौँ । नेपालमा अमेरिकी सहायता संस्था ‘मिलेनियम च्यालेन्ज कर्पोरेसन’ (एमसीसी) अन्तर्गतका सबै परियोजना स्थगन भएको छ ।
नेपाल सरकारलाई यसबारे फागुन २ मा इमेल आएको अर्थ मन्त्रालयले जनाएको छ। त्यसमा अमेरिकी सहायता संस्था मिलेनियम च्यालेन्ज कर्पोरेशन (एमसीसी) द्वारा नेपालमा सञ्चालित मिलेनियम च्यालेन्ज एकाउन्ट (एमसिसी) नेपालका कार्यक्रम स्थगन गर्ने जानकारी गराएको छ ।
अर्थ मन्त्रालयले विज्ञप्तिमार्फत तीन महिनाका लागि एमसिसी नेपाल कार्यक्रम स्थगित भएको औपचारिक जानकारी गराएको हो । विज्ञप्तिमा भनिएको छ,‘एमसीसी कोषबाट भुक्तानी हुने क्रियाकलापहरू अमेरिकी राष्ट्रपतिको गएको जनवरी २० तारिखमा जारी ९० दिनको स्थगनसम्बन्धी कार्यकारी आदेशअनुसार कार्यक्रम रोकिएको ब्यहोरा सरोकारवालालाई जानकारी गराइन्छ ।’
एमसीसीको परियोजना स्थगन भएसँगै उक्त सहयोग मार्फत नेपालमा भइरहेको सम्पूर्ण योजना अलपत्र परेको छ। साथै नेपालसँग निर्धारण गरेको समयावधि छोटिँदै गएको कारण योजनाहरू थप अन्योलमा परेको हो ।
अमेरिकाले एमसिसी अनुदान स्थगन गरेसँगै एक खर्ब रुपैयाँको परियोजना संकटमा परेका छन् । एमसिसीको ५५ करोड डलर र नेपाल सरकारले १९.७ करोड डलर गरी परियोजनाको कुल रकम ७४.७ करोड डलर अर्थात् करिब एक खर्ब रुपैयाँ पुगेको थियो । एमसिसी परियोजनाअन्तर्गत विद्युत् प्रसारणलाइन र सडक पूर्वाधार निर्माणका काम सुरु भएका थिए ।
साथै नेपाल सहित अमेरिकी राष्ट्रपति डोनाल्ड ट्रम्पले भारतमा मतदान प्रतिशत बढाउन दिइने आर्थिक सहयोग रोक्ने निर्णय सुनाएका छन् । ट्रम्पले भारतलाई उक्त आर्थिक सहयोग दिन आवश्यक नभएको धारणा व्यक्त गरेका छन् ।
अमेरिकी राष्ट्रपति ट्रम्पले भारतलाई २१ मिलियन डलर दिइरहेकोमा भारत विश्वमा सबैभन्दा बढी कर लगाइने देशहरूमध्ये एक भएको उल्लेख गर्दै उक्त रकम रोक्ने धारणा व्यक्त गरेका छन् ।
