काठमाडौं । साताको तेस्रो कारोबार दिन आज शेयर बजार परिसूचक नेप्से दोहोरो अंकले घटेको छ। नेपाल स्टक एक्सचेञ्ज नेप्से परिसूचक आज ५१.११ अंकले घटेर २७०२.६५ को बिन्दुमा कायम भएको छ।
आज ३१० कम्पनीको २ करोड २५ लाख ८८ हजार २४७ कित्ता शेयर किनबेच हुँदा १० अर्ब ४६ करोड ८३ लाख रुपैयाँको शेयर कारोबार भएको छ। आज १३ वटै उपसूचक राताम्य भएका छन् । जसमध्ये बैंकिङ समूहको १.११ प्रतिशत, विकास बैंक समूहको २.२९ प्रतिशत, फाइनान्स समूहको २.३१ प्रतिशत, होटल तथा पर्यटन समूहको ३.१७ प्रतिशतले शेयर मूल्य घटेको छ ।
मङ्गलवार फराकिलो अंकको गिरावट आउँदा पुनः सूचक २७ सयकै नजिक झरेको छ। अल्पकालीन कारोबारीमा नाफा बुक गर्ने प्रवृत्ति देखिंदा पनि सूचक बढी प्रभावित भएको जानकारहरूको भनाई छ । पछिल्ला दिनहरूमा कारोबार रकम भने बढोत्तरी आउदै गइरहेको छ । कारोबार रकम औसतमा १० अर्बको हाराहारीमा हुँदा पनि सूचकले भने २७ सयको मनोवैज्ञानिक विन्दुलाई क्रस गर्न सकेको छैन । यसलाई क्रस गर्न नसकेपछि पुनः करेक्सन भइरहेको देखिन्छ ।
यसअघि २६ सयको तहमा पनि नेप्से पटक पटक करेक्सन भएको थियो । बारम्बारको करेक्सनपछि अन्ततः सूचक २७ सयको तहमा उक्लिन सफल भएको थियो । सेयर बजारका लागि तुलनात्मक रुपमा राम्रो वातावरण बन्दै गएको छ । बैंकहरुले ब्याजदर पुनः घटाएका छन् । निक्षेपको ब्याज निकै न्यून विन्दुमा झरेको छ । सेयर कर्जाको ब्याजदर पनि एकल अंकमा आएको छ । यसकारण लगानीकर्ता सेयर बजारतिर आकर्षित हुँदै जाने वातावरण बनेको छ ।
